Jalgaon Crime News: केंद्रीय मंत्री रक्षा खडसे यांच्या मालकीच्या मुक्ताईनगर येथीस पेट्रोल पंपावर दरोडा पडला होता. या दरोड्याप्रकरणी मोठी अपडेट समोर आली आहे. या प्रकरणात पोलिसांनी मोठी कारवाई केली आहे. पोलिसांनी या प्रकरणी सहा जणांच्या मुसक्या आवळल्या आहे. नाशिक व अकोल्यातून या दरोडेखोरांना ताब्यात घेण्यात आले असल्याची माहिती पोलीस अधीक्षक डॉ. महेश्वर रेड्डी यांनी दिली.
स्थानिक गुन्हे शाखेच्या पथकाने ही कारवाई केली आहे. पथकाने दरोड्यात वापरण्यात आलेल्या साहित्यासह 3 गावठी पिस्टल, 5 मॅगझीन, 10 जिवंत काडतुस, 9 मोबाईल फोनसह रोख रक्कम असा मुद्देमाल जप्त केला आहे. दरोडेखोरांनी 9 ऑक्टोबर 2025 रोजी मुक्ताईनगरातील बोदवड चौफुलीवरील मंत्री रक्षा खडसे यांच्या मालकीच्या पेट्रोल पंपावर तसेच तालुक्यातील कर्की फाटा येथील मनुभाई आशीर्वाद पेट्रोल पंप आणि वरणगाव शिवारातील तळवेल फाटा येथील सय्यद पेट्रोल पंप या तीन ठिकाणी दरोडा टाकला होता.
दरम्यान, दरोडेखोरांनी बंदुकीचा धाक दाखवत दरोडा टाकला होता. यावेळी दरोडेखोरांनी रोख रक्कम, मोबाईल फोन आणि सीसीटीव्ही डीव्हीआर असा एकूण 1 लाख 33 हजार 500 रुपयांचा मुद्देमाल जबरदस्तीने चोरून नेला होता. या प्रकरणी मुक्ताईनगर पोलीस ठाण्यात गुन्हा दाखल करण्यात आला होता. पथकाने तपासचक्रे फिरवत दरोडा उघडकीस आणला आहे. त्यानुसार पोलिस निरिक्षक राहुल गायकवाड यांच्या नेतृत्वाखालील 5 तपास पथकांनी अहोरात्र 4 दिवस तांत्रिक माहितीच्या आधारे आरोपींचा मुक्ताईनगर ते नाशिक आणि अकोला पर्यंत पाठलाग केला. पथकाने 4 आरोपींना नाशिक येथून, तर 1 आरोपी आणि 1 विधी संघर्षित बालकाला अकोला येथून ताब्यात घेतले आहे.
ताब्यात घेण्यात आलेल्यांमध्ये पंकज मोहन गायकवाड (वय 23, रा. भुसावळ), हर्षल अनिल बावस्कर (वय 23, रा. अकोला), देवेंद्र अनिल बावस्कर (वय 23, रा. अकोला), सचिन अरविंद भालेराव (वय 35, रा. भुसावळ ह.मु. खकनार, जि. बऱ्हाणपूर-मध्य प्रदेश), आणि प्रदुम्न दिनेश विरघट (वय 19, रा. अकोला) या पाच संशयित आरोपींसह एका विधी संघर्षित बालकाला ताब्यात घेतले आहे. या सर्व आरोपींना पुढील तपासकामी मुक्ताईनगर पोलिसांच्या ताब्यात देण्यात आले आहे.
